** توهة ** _ _ _ _ بقلم / فهمى على

** توهة **

و نتقابل
سنيننا الخاينة وجعانا
و راسمة خطوط على وشوشنا 
و جوانا حاجات تدبل
فى وقت العمر ما يحوشنا
نفكر بعض و نحاول
نجيب ايامنا م الاول
فنمشى جوا احلامنا
نتوه ... و التوهة بتطول
وصلنا لفين ف سكتنا
و مين كمل و مين راح غاب
و من ضاع الطريق منه
و مين قال احنا مش اصحاب
و مين كان فجر فى الضلمة
و فجأة الضلمة سكنت فيه
و مين الضحكة على وشه
بتشبه قلبه و بتحكيه
و لسه برائته فى عيونه
بنفس الطيبة و المعنى
بيسأل كل لحظة بشوق
و بيحاول يجمعنا
و فين وازاى و امتى و ليه
و الف حكاية مع ذكرى
بنغسل روحنا من روحنا
عشان نقدر نعيش بكره
نمد ايدينا و نسلم
و نتمنى لقا تانى
و فى عنينا دموع خايفة
و دعوة صافية ربانى
تدوم بينا حاجات بينا
بنحكيها فتحكينا
فترسم ضحكة فى قلوبنا
و تمسح دمعة ف عنينا
بقلم / فهمى على