الشاعرة ملك محمود الأصفر،،،زقاق البرغل

قصيدة باللهجة العامية الشامية...بعنوان ...
زقاق البرغل ...
بقلمي ...
..................................
يا زقاق البرغل إلك ذكرى جميلة
بهتت صورها و بعدا لسا ببالي
دار عربية وشجرة حلوة طويلة
شجرة نارنج وبحرة ودرج للعالي
وخص الأحلام موجود بغرفة كبيرة
بالعالي فوق وما بيتتمن بالغالي
بتشوف الحارة كلا منو وبتراقب
الرايح والجاي والجو بيبقى خيالي
......................
وولاد صغار بعدن بعمر الورد
نلعب سوى وقضينا أحلى الليالي
مها وحنان ومصطفى بهاك الوقت
شو ركضنا بالحارات وتسلينا تسالي
سقى الله أيامك يا زقاق البرغل
أديش كنا نزور فيك الغوالي
أبو عبدو الحارس وابنه محمد بشير
والخالة بدرة وأيام صارت خوالي
.........................
وما بنسى حنفية المي
ال كانت ع المكبس تفتح
وباب الحارة العاشية
بيتسكر والصبح بيفتح
ومدرسة الحجة وهيبة
وولاد من الصبح بتسرح
ووجوه حلوة وجميلة
من الصبح فيها بتتصبح
........................
وما بنسى سوق مدحت باشا
وفي حدو سوق الحميدية
كنا نشتري ونتبضع
وما نرجع حتى المسوية
ونشتري بوظة وكنافة
وشو طيبة البوظة العربية
وشو كانت حلوة طفولتنا
وأيام صارت مخفية
............................................
ملك محمود الأصفر